Ўзбеклар Россия-Украина чегарасини истило этди

Россиядаги мухожирларга қарши кайфият энди қўшни давлатларга юқа бошлаган, шекилли. “Новый Регион” сайти бугун “Россия-Украина чегараси кичик Ўзбекистонга айланди” сарлавҳали ваҳимали мақола эълон қилди. Мақолада, жумладан, шундай дейилади: “Янги йил бошланиши биланоқ Россия-Украина чегарасини юзлаб гастарбайтерлар истило этди. Улар ҳужжатларини янгилаб олиш учун Россия ҳудудини вақтинча тарк этиб, рус тупроқларига қайтадан кирмоқчи бўлган ёлланма ишчилар. 5 январь куни “Новый Регион” мухбири Россия-Украина чегарасига “ёпирилиб” келаётган Ўрта oсиёликларга гувоҳ бўлган. Чегара ўтиш пунктида ўнлаб машина ва микроавтобусдагилар ташқи кўринишдан Ўрта осиёликлар экани айтилади. (Аммо “мухбир” ўзи бориб сўраганда аниқроқ бўларди. – таҳр.)

Мақолада яна ёзилишича, яшил паспорт эгалари шлагбаум қаршисида навбатга туриб олишган. Кимдир чегарани яёв кесиб ўтмоқда, кимдир микроавтобусда. Автомобиль ва микроавтобусдаги жойлар ҳаммаси пуллик. Баъзилар славян (!) шофёрларга нейтрал зонага олиб ўтиш учун пул таклиф қилишади. Ҳужжатлар текширилгач, чегара кесиб ўтилгач, Ўрта Осиё фуқаролари шу жойнинг ўзидан қайтиб Россия Федерацияси ҳудудига кириш учун нейтрал зонада яна навбатга туришади. (Аслида, буни ҳар қандай мухожир ҳам қилади, ҳатто аксарият ҳолларда украинларнинг ўзи ҳам – таҳр.)

Мухбирнинг айтишича, Россия чегарасини кесиб ўтиш бир ярим соат вақтни олган. Украина тарафидан қайтиб кириш эса бор-йўғи 10 дақиқада ҳал бўлган.

Эслатиб ўтамиз, шу йилнинг 1 январидан бошлаб Россия ҳудудида чет эллик фуқароларнинг вақтинчалик қолиш қонун-қоидаларига бир мунча ўзгартиришлар киритилган. МДҲ давлатларининг фуқаролари Россияда қайдсиз 90 кун давомида қолишлари мумкин. Бу қоидани бузган шахслар эса, уч йилга ушбу давлатга кириш ҳуқуқидан маҳрум этилиши мумкин деб хабар буради Uzbek.FM.