Гулнора Каримова – коррупция бўйича «Йил одами»

Уюшган жиноятчилик ва коррупцияни тадқиқ этиш маркази (OCCRP) Ўзбекистон президентининг тўнғич қизи Гулнора Каримовани «Йил одами» деб эълон қилди. Марказ «Йил одами» номини коррупция ва уюшган жиноятчиликда «ўзини кўрсатган»ларга беради. Жорий йилда бу «унвон» Гулнора Каримовадан ташқари депутатларни коррупция учун жавобгарликдан озод қилган Руминия парламенти ва серб наркобарони Дарко Саричга раво кўрилди. Марказ швед-фин TeliaSonera телекоммуникация компанияси билан боғлиқ пора иши бўйича терговни эслатиб ўтган. Компания Ўзбекистонда лицензия олиш учун йирик миқдорда (бир неча юз миллион доллар) пора берганликда гумон қилинмоқда. Швед журналистлари маълумотига қараганда, пуллар Гулнора Каримовага алоқадор деб тахмин этилаётган Takilant Limited компаниясига ўтказилган. Мазкур компаниянинг Швециянинг Nordea банкидаги ҳисоби музлатиб қўйилган. TeliaSonera бош директори бу можаро туфайли истеъфога чиқди. OCCRP (Organized Crime and Corruption Reporting Project) – коррупция ва уюшган жиноятчиликни ўрганиш билан шуғулланувчи бир нечата ташкилотларни ўз атрофига бирлаштирган. Уни БМТнинг Демократия жамғармаси (UNDEF) ва АҚШнинг Халқаро ривожланиш бўйича агентлиги (USAID) қўллаб-қувватлайди.