UZ: Республика қўғирчоқ театри 75 йиллигини нишонлашга тайёрланмоқда

Тошкент шаҳри ва унинг меҳмонларига, айниқса, жажжи болажонларга завқ-шавқ улашаётган Республика қўғирчоқ театри бу йил ўзининг 75 йиллигини нишонлайди. Театрга расман 1939 йил 19 октябрда асос солингани айтилса-да, аслида қўғирчоқ театри ўз фаолиятини 1928 йили бошлаган. Ўша йили ташкил топган Рус ёш томошабинлар театри қошида кичик ўзбек қўғирчоқ труппаси юзага келган эди. Труппанинг биринчи актёрлари халқ қўғирчоқбозларидан Пўлатжон Дониёров ва ёш санъатчи Нурхон Эшмуҳамедов, Ҳамидулла Абдуллаев, М. Солиев ва Олим Холимтоевлар бўлган. Мана шу дастлабки қўғирчоқ труппа қийин шароитда ишлаган бўлса-да, ўзининг қувноқ санъати билан кўпчиликнинг эътиборини қозонган. 1929 йили май ойида ёш труппага «Ўзбекистоннинг биринчи Давлат ёш томошабинлар театри» номи берилди. Республика қўғирчоқ театри ўзининг юбилей мавсумида жажжи мухлисларни янги-янги эртаклар, мюзиклли саҳналар ҳамда концерт дастурлари билан қувонтиришни мақсад қилган. Аҳил жамоа йил давомида ўз саҳнасида қўғирчоқ Ялмоғиз кампир, лақма Бўри, айёр Тулки, Хўжа Насриддин, Минг бир кечадаги Шаҳризод, омадли Алоуддин, Малика Жасмин ва меҳрибон Жинлар иштирокидаги қизиқарли спектаклларни кичик томошабинлар эътиборига ҳавола этади.