Россия: 2013 йилда 20 киши миллатчилар қурбонига айланди

2013 йилда Россиянинг 32 минтақасида миллатчилар 20 кишининг умрига зомин бўлди, камида 173 кишини жароҳатлади. «Сова» ахборот-таҳлил маркази маълумотига қараганда, миллатлараро тоқатсизлик борасида Москва (8 киши ҳалок бўлган, 53 киши жароҳат олган) ва Санкт-Петербург (3 киши ҳалок бўлган, 32 киши жароҳатланган) етакчилик қилмоқда. Ўтган йили россиялик миллатчилар қўлида қурбон бўлганларнинг 13 нафари ва яраланганларнинг 39 нафари марказий осиёликдир. Эслатиб ўтамиз, 9 декабрь куни Федерал миграция хизмати раҳбари Константин Ромодановский Россияда ксенофобия ва ўзга миллатларга нисбатан тоқатсизлик кучайиб бораётганини эътироф этган эди. Унинг фикрича, бу ҳолатга мухожирларнинг ўзи ҳам айбдор. «Улар Россияда ўзларини худди уйидагидек тутади. Турган гапки, бу фуқароларимизга ёқмайди», – деди К. Ромодановский