ЎзХДП “бошқа сиёсий партиялардан ғоявий устун томонларини очиб бермоқчи”

Ўзбекистон Халқ демократик партияси барча минтақавий кенгашларда мазкур масалани депутатлар, партия фаоллари, электорат вакиллари орасида кенг тарғиб қилмоқда, ундан келиб чиқадиган вазифаларга бағишланган семинар-тренинглар, давра суҳбатлари ҳамда учрашувлар ташкил этмоқда. «Ўзбекистон овози» газетасининг ёзишича, ана шундай тадбирлардан бири Сирдарё вилоят партия кенгашида ўтказилди. ЎзХДП Марказий Кенгаши раиси ўринбосари Рустам Комиловнинг фикрича, Президентимизнинг Конституция кунига бағишланган тантанали маросимдаги маърузасида сиёсий партиялар фао¬лиятига тўхталиб, бугунги кунда улар зиммасидаги муҳим вазифаларга эътибор қаратди.
“Билдирган фикрлари ҳар бир сиёсий партияни ўз фаолиятига танқидий ёндашиб, келажак режалар хусусида чуқур ўйлаб кўришга ундайди”, — деди у. — “Шу боис биз аввало, Сайлов¬олди дастурида белгиланган вазифаларни қай даражада бажараяпмиз, деган саволни ўзимизга беришимиз лозим”. ЎзХДП вакилига кўра, маҳаллий Кенгашлардаги депутатлик гуруҳларининг имконият ва ваколатларидан самарали фойдаланиш масаласи биринчи ўринда туриши лозим. Депутатлик гуруҳи бир масалани туман Кенгаши сессиясига олиб чиқди ёки Жамоатчилик қабулхонасига тушган мурожаатни ўрганиб, депутатлик сўрови орқали ҳал этди. “Бу масала ечим топди дегани эмас. Бу ишнинг биринчи босқичи холос. Эндиги навбат электорат манфаатларига доир масалаларни комплекс ҳал этиш, унга жамоатчилик эътиборини қаратиш, вилоят, республика даражасига олиб чиқишдир. Шу орқали партиянинг мамлакат тараққиёти, жамият ривожидаги иштирокини фаоллаштиришимиз лозим”, — деди у, жумладан. Бундан ташқари, унинг фикрича, сиёсий партия давлат Дастурлари, мамлакат миқёсидаги муҳим ижтимоий-сиёсий масалалар, мамлакат келажаги юзасидан ўз таклифларини бериши лозим. Ана шундагина партия сиёсий куч сифатида жамият ҳаётида муносиб ўрин эгаллайди. Рустам Комилов бунинг учун биринчи навбатда бошланғич партия ташкилотлари фаолиятини янада кучайтириш кераклигини айтади. Айниқса, ҳудудий ташкилотлардаги тарғибот ишларини жонлантириб, аҳолига партия ғоя ва мақсадларини чуқур тушунтириш, бошқа сиёсий партиялардан ғоявий жиҳатдан устун томонларини очиб бериш лозим. - See more at: http://uz.ca-news.org/news:24146/#sthash.MdOfQjQC.dpuf