Samsung эгилувчан телевизорини тақдим этди

Ишлаб чиқарувчиларнинг сўзларига кўра, янги хай-тек маҳсулоти одамзотнинг телевизор ҳақидаги тушунчаларини умуман ўзгартириб юборади. Эгилувчан телевизорларнинг тақдимоти Лос-Анжелесда бўлиб ўтди. Samsung компанияси планшет ҳамда фотокамераларнинг янги моделларини тақдим этиш билан бирга ойнаи жаҳоннинг бир нечта эгилувчан моделларини ҳам кенг оммага намойиш этди. Тақдим этилган янги телевизорлар жами 10 тани ташкил қилса, улардан 4 таси эгилувчан экранга эга. Масалан, 85” Ultra HD (UHD) дисплейли телевизорнинг эгилувчан режимини ўчириб қўйиш учун битта тугмачани босиш кифоя. Ишлаб чиқарувчиларнинг сўзларига кўра,
янги хай-тек маҳсулоти одамзотнинг телевизор ҳақидаги
тушунчаларини умуман ўзгартириб юборади.
Ҳақиқатдан ҳам, техника маҳсулотларини ишлаб чиқарадиган бошқа компаниялар ҳали бу даражага етгани йўқ. Samsung эса рақобатчиларидан анча илғаб кетди ва бундан мақтанса бўлади. Тақдимотда компания ўзининг янги флагмани – 105 дюймли эгилувчан экранга эга телевизори билан ҳам таништириб ўтди. Унинг кенглиги 21:9 нисбатига эга бўлиб, 5120 x 2160 пикселгача кўтара олади. Шунингдек, LCD телевизорларига қараганда юқори тиниқликка эга. Дюйми катта бўлган телевизорнинг яна бир устун жиҳати шуки, кўрсатув ва киноларни Auto Depth Enhancer технологияси ёрдамида 3D форматда бемалол кўриш мумкин. Ишлаб чиқарувчилар янги технологияларнинг ёрдамида телевизорлар сифати анча яхшилангани, айниқса, рангларнинг аниқ ва деталли етказиб берилиши, лавҳаларнинг тиниқлигини таъкидламоқда. Бундай янги технологияларга HD ва Full HD контентини UHD даражасигача ўтказиб берадиган PurColor ва UHD апскейлинг технологияларидир. -